Gen 3 | WSK | STEP | Kaem Biya buruk-kausik suen biya beteram, bare ma mu ko ikia kawel te suen la nunga kiaram. Se ma imet isuam, “Kaem nunguningta balam nina tam ningam ningi wore ko nunguning suen la me nalko balam e?”

Genesis 3

Adam Eve ilak Kaem kuring batagorman

1 Kaem Biya buruk-kausik suen biya beteram, bare ma mu ko ikia kawel te suen la nunga kiaram. Se ma imet isuam, “Kaem nunguningta balam nina tam ningam ningi wore ko nunguning suen la me nalko balam e?”

2 Se imet ma maonam, “Ana tam suen biya ningam ningi aniso mu ko nunguning am nanakko. 3 Bare tam suwanta kusumuri sanamiwoso mu Kaem balam ana ko nunguning me nanakko mam. Nu balam ana tam mu ko nunguning nanak agi ilu tanak, mu ana kuenakko mam.”

4 Se ma imet maonam, “Mena, nina me kueralko. 5 Nina nal, mu nina Kaem iwitatala bagaralko, ale munan ningo aguwaya, se munan memek aguwaya mu ko ikialko. Se Kaem butata ikiam ale nina nigiring kaolam.”

6 Se imet tam mu arigam, ko ariga yawara, ko nunguning betela yawara tala. Nu ikikaso nu ikia biyala uwutatala tauk mu asele yawarakala. Se nu tam mu ko nunguning tam ale nam. Ale sikina karogo nama ko kuari tuam se nam. 7 Se tairatela nuna ikiman nuna nunguning la mu nunumi ikiman, ale tam fig ko gawa giman ale nunumi te ereman.

8 Sor baingam ale ipiram se kari ko imet ilak Kaem Biya ningam ningi aolak iluwam taikaso se kumik nirung ikiman ale nama tam duap ningi yumuman. 9 Bare Kaem Biya kari mu auram, “Ni apalak bagasam a?” mam.

10 Se kari mu den koma balam, “Ani ni ningam ningi aolak iluwem se kimik nirung ikiem, ale ani nunguning la, se nguangerem ale yumuwasam.”

11 Se Kaem isuam, “Awiri nika maonam ni nunguning la bagasam? Ni tam nunguning me noko ani balem wore ni naem agila?”

12 Se kari balam, “Imet ni keta ani aisem ewere nu ani tam nunguning aisam se naem.”

13 Se Kaem Biya imet isuam, “Ni anape ko munan sowore beterem?”

Se imet balam, “Ma aninga kulam se naem.” ^{▼▼Gen 3:1-13 Satan ko kawel kula: John 8:44; Rev 12:9; 1 John 2:15-17; 4:18.}

Kaem munan memek ko koma balam

14 Se Kaem Biya ma iwita maonam,

“Ni munan memek beterem. Buta se ni ikup giko.
Nika ikup mu buruk-kausik suen biya nunga ikup kiarukko.
Ni tom suen biya tagu luan te lagerko.
Ale tom suen biya ali gege no se lagerko.
15 Ni imet ko kager kari, se imet nika kager kari uwutata lagaralko.
Nika gue te, se imet ko gue te, mu nunumi kager tui tui lagomonko.
Imet ko gue te mu nika sipiling ita parasuwurokko,
se ni noko suwik durum usirko.” ^{▼▼Gen 3:15 Jesus imet ko gue te bilanguruk ale Satan ko sokel menawurokko: Mat 1:23; 1 Cor 15:25; Gal 4:4; 1 John 3:8; Rev 12:17.}

16 Kaem aking imet iwita maonam,

“Tom ni tagu ago, mu ni ikup yaman biyala ka morukkowo.
Se kuriang ilupko, mu yaman biyala ka irokko.
Bare nika kari am ko kuarko, se nu nika bituokko. ^{▼▼Gen 3:16 Bala bo mu iwita: “Ni ka kari bitaruko kuar, bare nu nika bituokko.”}”

17 Se aking Kaem Biya kari iwita maonam,

“Ni ka niwus ko kuring karem ale tam nunguning ani me noko balem wore ni naem.
Buta se ani ali maguwusam, se na inang ninguru me te kapurukko.
Ni keta tom suen biya kimik sail yaman iki se na ko ura ilup se aratukko.
18 Tam kore ago mu se, sum sirsir memek mu ali te aratukko.
Se ni giarum ningi ko tam gawa mu no se lagerko.
19 Ni ali te ura kowar to se inang aratukko,
ura kowar la ilu laga ali ningi namarko.
Ani ali gege te nika nungem;
buta se ni piler ali ningi namarko.” ^{▼▼Genesis 3:19 Rom 8:20-22}

20 Adam ko nuwus auram Eve, mu awuk, nu kariimet suen biya nunga taleng girigir imet.

Kaem Adam Eve ningam ningi nunga kaoram

21 Se Kaem Biya mel saki nunga guang te guang sang nungam, ale ilagala mu nungaram se kataman.

22 Asele nu balam, “Aitak kariimet munan aguwaya ningo mu se, munan aguwaya memek mu ko ikiman, ale nuna ana iwitatala arataman. Se nuna tam tom suen biya te marak bagomonko umutang ko nunguning me namonko.” 23 Se Kaem Biya ningam Eden ningi kariimet nunga kaoram, ale nunga diruwuram se ali gege nu te nunga beteram wore te ura tamonko arataman. Arataman se ko engel cherubim ningam Eden mu ko koma worem bausa mu te nunga awuram se bagakasan. Ale batir bo, tama kuamili ago, koma mu te karogo beteram se nama pilawakaso, kariimet bo marak nungara ko tam wore duap ningi namuruk bore ko.

24